「喂!今個禮拜幾點去打波?」 我在澀谷打羽毛球

「喂!今個禮拜幾點去打波?」 我在澀谷打羽毛球

你以為住東京生活多姿多采,天天購物日日食好西?當然唔係拱啦!當你定居下來,生活亦會歸於平淡,不像剛來日本時連去商店街走一轉都未出發先興奮。尤其是低效率工作模式令人窒息,困在慘白的office真的會人癲,於是,打羽毛球成了我近一年來的重點減壓項目之一!

自從去年夏天開始打羽毛球後⋯⋯瘦?不見得,但出汗令人更精神,氣息都好一點!
於是,放工去打羽毛球,週末又去打羽毛球,背上多了一塊球拍,好像寶劍一樣。

我以前都寫過,運動帶來的快樂很單純又很充實。運動的時候可以完全拋開手機不上網,不看SNS,那兩三個小時看著球來球往,等的時候便跟波友吹吹水,幾開心。流汗是一種快感,贏波又是另一種快感。工作上精神累了,其實更需要郁動身體來填補精神壓力帶來的疲累。

有些人打波好認真,非勝不可,小家子氣都跑出來﹔有些球技不精,但輕鬆對待,失波的反應好睇過殺波﹔有的分明是比賽級,卻不嫌你是初哥,耐心教導,超超超超級好人。如果去做gym呀去跑步呀,獨行俠運動便看不到這些畫面了,我還是覺得有競爭的運動始終較刺激好玩!

多打幾次見多幾面,自自然然同道中人會走在一起,每星期定時定候有人會在群組內問你﹕「喂!今個禮拜幾點去打波?」

不過在東京要確保有場地打羽毛球有難度。
方法一﹕等體育館公眾開放日。我通常去澀谷打,200日圓/1小時,只得2個court,最多同時有20人在等,真的可以等到天荒天老都未輪到你。
方法二﹕豪一次租幾面court再湊腳一齊打。有些5000多圓租2個court,也有3個court租金9000日圓,場地不同收費亦各異。就算吹雞亦未必人到齊,成本會高些少。
如果可以好似香港咁,上網book場先到先得,公平又方便,你話幾好呢?